女性職場｜「講個秘密俾你知」當人情 鄭丹瑞：講明是秘密發夢也應閉嘴

「講個秘密俾你知，不過你千祈唔好同人講。」任何人在我耳邊講這兩句說話，我第一時間的反應是：「我唔想知，你千祈唔好同我講。」首先，我天生不好奇八卦別人的事，而最重要的是，可以跟人分享的，那叫做心事，講明叫秘密，那就應該連發夢也閉嘴，絕對不能跟第二個人吐露。

偏偏，這個世界就有人喜歡以秘密當人情：「你知唔知阿邊個邊個做咗啲乜嘢乜嘢？我淨係講你知，你千祈唔好周圍講。」講的人當送大禮，使到聽的人覺得自己很重要：「佢連咁秘密嘅嘢都願意講俾我聽，我一定係一個對佢好重要嘅人。」年輕時，就試過有這樣的一次經驗：對方煞有介事地講一個秘密給我知道，千叮萬囑，不能夠告訴別人：「淨係講俾你一個知。」

我信以為真，滿心歡喜地將秘密鎖在保險箱。然後有一天，對方對我大興問罪之師：「叫咗你唔好周圍同人講，依家周街都知道個秘密。」我誓神劈願：「你吩咐我唔好講，我真係無同人講過。」「一定係你。」對方指住我鼻哥：「呢個秘密，我淨係同你，同阿甲、阿乙講過！佢哋都話唔係佢哋傳出去嘅，咁仲唔係你？！」「但係你明明話淨係講俾我一個知，咁依家阿甲、阿乙都知道，你無理由淨係賴我喎！」

聽過一句「來說是非者，便是是非人」，如此推論：那個說秘密者，就更加是個「是非精」！慶幸我身邊已沒有這種是非精，因為他們知我不好奇、不八卦，講秘密給我聽，是浪費。

中小學測考季即將來臨，TOPick精選名校的中、英、數、常練習題：立即免費下載

HKET App已全面升級，TOPick推出親子、健康、娛樂、港聞及休閒生活資訊及影片，立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5